बैतडी सहित सुदुरपश्चिममा गौराको रौनक,पहिलो दिन आज बिरुडा भिजाइँदै

बैतडी — सुदूरपश्चिमको मौलिक पहिचानसँग जोडिएको महान् सांस्कृतिक पर्व गौरा आजदेखि विधिवत् रूपमा सुरु भएको छ। भाद्र शुक्ल पक्षको पञ्चमीका दिनदेखि सुरु हुने गौरा पर्वको पहिलो दिन आज व्रतालु महिलाहरूले घर–घरमा बिरुडा भिजाएर पर्वको सुरुवात गर्ने गरेका छन्।

गौरा पर्वको पहिलो दिनलाई बिरुडा पञ्चमी भनिन्छ। आज महिलाहरूले पाँच प्रकारका अन्न तथा गेडागुडी मिसाएर तयार पारिएको बिरुडा भिजाउने धार्मिक परम्परा रहेको छ। बिरुडालाई गौरा पर्वमा विशेष महत्वका साथ प्रयोग गरिन्छ।

बैतडी, डडेल्धुरा, दार्चुला, डोटी, अछाम, बाजुरा, बझाङलगायत सुदूरपश्चिमका विभिन्न जिल्लामा आजदेखि गौरा पर्वको चहलपहल सुरु भएको छ। गाउँ–बस्तीमा धार्मिक आस्था र परम्परासँगै पर्वको रौनक बढ्दै गएको देखिन्छ।

आगामी दिनहरूमा महिलाहरूले गौरा देवीको पूजा–आराधना गर्ने, देउडा खेल्ने तथा ढोल, दमाहा र विभिन्न परम्परागत बाजागाजासहित सांस्कृतिक कार्यक्रम आयोजना गर्ने चलन रहेको छ। गौरा पर्वले सुदूरपश्चिमेली कला, संस्कृति, परम्परा र सामाजिक एकतालाई जीवन्त राख्दै आएको छ।