बङ्गालको खाडीमा फलामे अयस्क बोकेको पनामाको जहाज डुब्यो: दुई जनाको उद्धार, २२ बेपत्ता

-भारतको ओडिशास्थित पारादीप तटबाट करिब २४० समुद्री माइल टाढा बङ्गालको खाडीमा पनामाको झण्डा भएको एक ठूलो मालवाहक जहाज डुबेको छ। ओडिशाको पारादीप पोर्टबाट भारी मात्रामा फलामे अयस्क (Iron Ore Fines) बोकेर सिंगापुरतर्फ जाँदै गरेको उक्त जहाज अचानक बेपत्ता भएपछि दुर्घटनामा परेको पुष्टि भएको हो।

यस दुर्घटनामा परेको जहाज ‘एमभी ओशन विनर’ (MV Ocean Winner) रहेको खुल्न आएको छ। करिब २२५ मिटर लामो र ३२.२६ मिटर चौडाइ भएको यो बल्क क्यारियर जहाजले अगस्ट २० तारिखको राति पारादीप तट छाडेर यात्रा सुरु गरेको थियो। तर, शनिबार मध्याह्नतिर म्यारीटाइम रेस्क्यु कोर्डिनेसन सेन्टर (MRCC) लाई यो जहाजसँगको सञ्चार सम्पर्क टुटेको र ट्र्याकिङ सिस्टमबाट हराएको आपतकालीन सूचना प्राप्त भएको थियो।

चालक दलका २४ सदस्यहरूको विवरण

अधिकारीहरूका अनुसार डुबेको जहाजमा कुल २४ जना चालक दलका सदस्यहरू सवार थिए। उनीहरूको विस्तृत विवरण यसप्रकार छ:

• चिनियाँ नागरिक: २० जना
• म्यानमारका नागरिक: ३ जना
• बंगलादेशी नागरिक: १ जना

दुई जनाको जीवितै उद्धार, तीव्र खोजी कार्य जारी

जहाज दुर्घटनामा परेको सूचना पाएसँगै भारतीय तटरक्षक बल (ICG) र भारतीय नौसेनाले संयुक्त रूपमा ठूलो स्तरको खोजी तथा उद्धार अभियान सुरु गरेका छन्। आपतकालीन नेटवर्क सक्रिय पारिएपछि घटनास्थल आसपास सञ्चालनमा रहेको ‘एमटी आिसोपोस्’ (MT AISOPOS) नामक व्यापारिक जहाजलाई उद्धारका लागि पठाइएको थियो। सोही जहाजको सहयोगमा समुद्रमा तैरिरहेका दुईवटा जीवनरक्षक डुङ्गा (Liferafts) बाट दुई जनालाई जीवितै उद्धार गर्न सफल भएको तटरक्षक बलले जनाएको छ।

तर, बाँकी २२ जना चालक दलका सदस्यहरू भने अझै बेपत्ता छन् र उनीहरूको खोजी कार्य जारी छ।

उद्धारका लागि बलहरू परिचालन

बेपत्ता भएकाहरूको खोजीलाई तीब्रता दिन भारतीय तटरक्षक बलले आफ्ना पानीजहाजहरू— आईसीजीएस वरद (ICGS Varad), आईसीजीएस अनमोल (ICGS Anmol) र पोर्ट ब्लेयरबाट आईसीजीएस विजयित (ICGS Vijit) लाई परिचालन गरेको छ। साथै, भारतीय नौसेनाले पनि आकाश र पानी दुवैतर्फबाट खोजी अभियानलाई व्यापक बनाएको छ। यसका साथै त्यस क्षेत्रमा आवातजावत गरिरहेका अन्य व्यावसायिक जहाजहरूलाई पनि सतर्क गराउँदै उद्धारमा सहयोग गर्न आग्रह गरिएको छ।

जहाज डुब्नुको कारण

पनामाको ध्वजाबाहक यो जहाज किन र कसरी डुब्यो भन्ने बारेमा अहिलेसम्म कुनै स्पष्ट कारण खुल्न सकेको छैन। यो घटना खराब मौसमका कारण भएको हो, जहाजमा कुनै प्राविधिक बिघाड आएको थियो वा अन्य कुनै आपतकालीन अवस्था सिर्जना भएको थियो भन्ने बारेमा आधिकारिक पुष्टि हुन बाँकी छ। उद्धार कार्य र अनुसन्धान अघि बढ्दै जाँदा यससम्बन्धी थप विवरणहरू बाहिर आउने अपेक्षा गरिएको छ।