गोदावरी वन अतिक्रमण विवाद: वन कार्यालयको लिखित स्पष्टीकरण र वन प्रमुखको बयानमै विरोधाभास

कैलालीको गोदावरी नगरपालिका–४ बासपानी चुरे क्षेत्रमा वन अतिक्रमण हटाउने क्रममा एउटा टेम्पो भीरबाट खसालिएको भिडियो सामाजिक सञ्जालमा भाइरल भएपछि विवाद चर्किएको छ। यसैबीच, डिभिजन वन कार्यालय कैलालीले मिति २०८३ जेठ ३१ मा एउटा प्रेस विज्ञप्ति जारी गर्दै आफ्नो आधिकारिक धारणा सार्वजनिक गरेको छ।

तर, कार्यालयको लिखित दाबी र डिभिजन वन प्रमुखको मौखिक बयानबीच देखिएको विरोधाभासले घटनालाई थप रहस्यमय बनाएको छ।

१. वन कार्यालयको लिखित दाबी: “दुर्घटना मात्रै हो”

डिभिजन वन प्रमुख डा. राम विचारी ठाकुरसहित २१ जना कर्मचारीको सामूहिक हस्ताक्षर रहेको विज्ञप्ति अनुसार जेठ २९ गते चुरे क्षेत्रको अतिक्रमण हटाउने अभियान चलाइएको थियो। पत्रमा उल्लेख गरिएका मुख्य बुँदाहरू:

• कबाडी खोका: सामाजिक सञ्जालमा प्रचार गरिए जस्तो सो टेम्पो चालु अवस्थाको सवारी नभई इन्जिन र चक्का नभएको फलामे अवशेष मात्र थियो, जसलाई घन्श्याम धामीले अवैध रूपमा पसलका रूपमा प्रयोग गरेका थिए।
• अटेर र गालीगलौज: एक महिनाअघि नै हटाउन निर्देशन दिँदा र वन कर्मचारीले गुडाई निजकै घरसम्म पुर्‍याइदिँदा पनि पुनः सोही ठाउँमा ल्याएर पसल थापिएको र उल्टै गालीगलौज गरिएको दाबी विज्ञप्तिमा छ।
• दुर्घटनावश खसेको: सो कबाडी टेम्पो हटाउन बल प्रयोग गर्दा भिरालो भौगोलिक सतह र असन्तुलनका कारण अनियन्त्रित भई दुर्घटनावश भीरबाट खस्न पुगेको पत्रमा लेखिएको छ।

२. वन प्रमुखको मिडिया बयान र स्थानीयको आरोप: “आवेगको परिणाम”

लिखित विज्ञप्तिमा ‘दुर्घटना’ भनिए तापनि डिभिजन वन कार्यालय धनगढीका प्रमुख रामविचारी ठाकुरले मिडियासँग कुरा गर्दै कर्मचारीहरू ‘आवेग’ मा आएर त्यसो गरेको हुन सक्ने स्वीकारेका छन्।

• वन प्रमुख ठाकुरको बयान: ‘हटाउन जाँदा कर्मचारीमाथि गालीगलौज भएपछि आवेगमा त्यस्तो घटना भएको हुन सक्छ,’ ठाकुरले भने। यसले वन टोलीले नियतवश नै टेम्पो खसालेको हुन सक्ने संकेत गर्छ।
• स्थानीयको भनाइ: टेम्पोलाई खुद्रा पसलका रूपमा प्रयोग गर्दै आएकी स्थानीय धनादेवी धामीका अनुसार, सामान बाहिर निकालेपछि आफूले टेम्पो घर लैजान आग्रह गर्दागर्दै पनि कर्मचारीहरूले बेवास्ता गर्दै भीरबाट खसालिदिएका थिए।

निष्कर्ष

• राजमार्ग क्षेत्रमा अतिक्रमण गरिएका ४७ वटा संरचना हटाउने अभियान सकारात्मक भए तापनि, सरकारी निकायले कानुन कार्यान्वयन गर्ने नाममा अपनाएको यो ‘आक्रोशपूर्ण’ शैली र लिखित पत्र एवं मौखिक बयानबीचको विरोधाभासलाई लिएर सामाजिक सञ्जालमा तीव्र बहस र आलोचना भइरहेको छ।

भिडियो स्रोत: सामाजिक सञ्जाल