बैतडी – पिपरा गाउँपालिका–६, रतौलीकी १८ वर्षीया ज्योती साहको दाइजो विवादका कारण हत्या भएको आशंकामा परिवारले गम्भीर आरोप लगाउँदै दोषीलाई कडा कारबाहीको माग गरेका छन्।
सात महिनाअघि जनकपुरधाम उपमहानगरपालिका–१३ का किसन साहसँग ज्योतीको विवाह भएको थियो। विवाहका बेला मोटरसाइकल दाइजो दिने सहमति गरेको भए पनि समयमा नपाउँदा उनीमाथि मानसिक र शारीरिक यातना सुरु भएको माइती पक्षको दाबी छ।
गत सोमबार श्रीमानको घरएकी ज्योतीको शव जनकपुरको प्रादेशिक अस्पतालमा भेटिएको थियो।
शवमा चोटपटक, भाँचिएको हात, र कनपटीमा गम्भीर चोटका निशान देखिएका छन् । परिवारजनले ज्योतीलाई हत्या गरेर झुन्ड्याइएको दाबी गरेका छन्।
माइती पक्षका अनुसार ज्योती गर्भवती थिइन्। उनको गर्भावस्थाका कारण दाइजो विवाद झन् तनावपूर्ण बनेको र यसले घटनालाई थप संवेदनशील बनाएको परिवारको भनाइ छ।
घटनाको सम्बन्धमा धनुषा प्रहरीले ज्योतीका श्रीमान् किसन साहलाई पक्राउ गरेको छ। सासुलाई पनि पक्राउ गरिएतापनि वडाध्यक्षको जमानतमा उनलाई रिहा गरिएको छ।
धनुषा प्रहरीले घटनाबारे विस्तृत धारणा दिन अस्वीकार गरेको छ। ससुरा पक्षले पनि घटनालाई ढाकछोप गर्न खोजेको माइती पक्षले आरोप लगाएको छ।
यो घटना दाइजो प्रथाको भयावह रूप हो। विवाहका समयमा सम्पत्ति, गाडी वा अन्य सामग्री माग गर्ने चलनले नारीमाथि हुने हिंसाको रूप लिएको छ।
समाजमा दाइजो प्रथाको अन्त्यका लागि कानूनी र सामाजिक चेतनाको आवश्यकता रहेको देखिन्छ।
ज्योतीका परिवारले दोषीलाई कडा कानूनी सजाय दिई मृतकका लागि न्याय सुनिश्चित गर्न माग गरेका छन्। समाजमा यस्ता घटनाको पुनरावृत्ति रोक्न दाइजो प्रथाविरुद्ध सशक्त कदम चाल्नुपर्ने आवश्यकता पनि देखिएको छ।
पाठक प्रतिक्रिया ०