बैतडीमा जंगली भालुको आतंक, १० मौरीका घारमा क्षति

बैतडीको दशरथचन्द नगरपालिका ५, औला गाउँमा जंगली भालुले मौरीका घारमा क्षति पुर्‍याएको छ।औला गाउँका घनश्याम भट्टको घरमा रातिको समयमा प्रवेश गरेको जंगली भालुले घरमा पालिएका मध्ये १० मौरीका घारमा क्षति पुर्‍याउँएको हो।
वर्षभरि मेहनत गरेर पालेका मौरीले अब उत्पादन दिने समयमा भालुले मौरी नै खाएपछि आफूलाई ठूलो क्षति भएको भट्टले बताउनुभएको छ।
मौरीपालनबाट आम्दानी गर्ने तयारीमा रहेका भट्टको मेहनत भालुको आक्रमणका कारण प्रभावित भएको छ।
स्थानीयका अनुसार कुनै समय यस क्षेत्रमा प्रशस्त खेती हुने गरे पनि पछिल्ला केही वर्षदेखि बढ्दै गएको बाँदर आतंकका कारण खेतबारी बाँझै रहन थालेका छन्। खेतीपातीमा वन्यजन्तुको समस्या बढ्दै गएपछि स्थानीयहरू थप चिन्तित बनेका छन्।
अब बाँदर र जंगली भालुलगायत वन्यजन्तुबाट हुने क्षति नियन्त्रणका लागि सम्बन्धित निकायले आवश्यक पहल गर्नुपर्ने स्थानीयको माग छ।