बैतडी,बैतडी जिल्ला अस्पताल देशभरमा रहेका प्राथमिक अस्पतालहरु मध्ये उत्कृष्ट अस्पताल बन्न सफल भएको छ । नेपाल सरकार, स्वास्थ्य मन्त्रालयले गरेको न्युनतम सेवा मापदण्ड मुल्यांकनका आधारमा बैतडी अस्पताल लगातार उत्कृष्ट स्थानमा आएको जिल्ला अस्पताल बैतडीका प्रमुख डा.सुशिल बिकले बताए । उनले अतिरिक्त सुबिधा सहितका अस्पतालहरु मध्ये भक्तपुर उत्कृष्ट भएकोमा प्राथमिक अस्पतालमा भने बैतडी उत्कृष्ट भएको बताए । यसरी लगातार जिल्ला अस्पताल उत्कृष्ट आउनुमा व्यवस्थापन समिति, स्वास्थ्यकर्मी तथा कर्मचारीहरुको महत्वपुर्ण भुमिका रहेको अस्पताल व्यवस्थापन समिति अध्यक्ष पार्वती भट्टले बताइन् । अस्पतालको नेतृत्व र वर्तमान कार्यालय प्रमुख डा. सुशिल विकको कार्यकौशलताले देशभरमै अस्पताललाई चिनाउन सम्भव भएको उनले बताइन् । प्राथमिक अस्पतालहरुको पछिल्लो मुल्यांकन मध्ये तेश्रो बर्षको रिपोर्ट सार्वजनिक हुन बाँकी रहेपनि लगातार २ पटक उत्कृष्ट अस्पताल बन्न सफल भएको हो । तेस्रो पटकको रिर्पोट सार्वजनिक भएको अवस्थामा समेत अस्पताल उत्कृष्ट अस्पतालकै रुपमा देखिने जिल्ला नेतृत्वको बिश्वास छ ।
