हरिशचन्द्र भाट
बैतडी । सुदूरपश्चिमका पहाडी जिल्लाहरूमा यतिबेला जात्राको रौनक सुरु भएको छ। दशैं–तिहारका रमाइला क्षणहरू सकिएसँगै गाउँ–बस्तीमा परम्परागत जात्रा र मेलाहरूले उत्सवमय माहोल सिर्जना गरेका छन्।
स्थानीय समुदायले हरेक वर्ष परम्परागत रीति अनुसार मनाइने जात्रा यसपटक पनि धुमधामका साथ आयोजना भइहेको बैतडीको सुर्नया गाउपालिका वडा नम्बर ०४ का निवर्तमान वडा अध्यक्ष दिनेश प्रशाद भट्टले जानकारी दिनुभयो।
बिषेश गरी बैतडी, डडेलधुरा, दार्चुला, बाजुरा र अछाममा अहिले जात्रा (जात)को रौनक छाएको हो।जात्रामा परम्परागत नाचगान, देउडा, स्थानिय बाजा दामाह ले गाउँभरि उत्साहको लहर फैलिएको छ।
जात्रामा गाउँका बुढापाका र बालबालिका समेत सहभागी हुँदा जात्रा केवल मनोरञ्जन नभई एकताको प्रतीक समेत बनेको छ।
परम्परागत जात्राले गाउँमा भेटघाट, मेलमिलाप र सामुदायिक भावना बलियो बनाउँछ। यस्ता उत्सवहरूले पुरानो संस्कृतिको संरक्षण मात्र होइन, नयाँ पुस्तालाई आफ्नै पहिचानप्रति गर्व महसुस गराउँछ पछिल्लो समय यस्ता सस्कृति लोपहुने अवस्थामा छन हाम्रो सस्कृतिलाई लोप हुन दिनु हुन्न हामी युवाहरुले जाग्नुपर्छ युवा दिनेश महराले भन्नुभयो ।
यसपटकका जात्रामा धार्मिक झाँकी, खेलकुद प्रतियोगिता र स्थानीय उत्पादनको प्रदर्शन पनि गरिएको छ। केही ठाउँमा भने मेला व्यापारको रूप लिँदै स्थानिय अर्थतन्त्रलाई समेत टेवा पुगेको छ भने सुदूर पहाडका जिल्लाहरुमा अहिले जात्रा “जात”को रौनक छाएको छ।
