बैतडी : सुदूरपश्चिम रोयल्सले नेपाल प्रिम्रियर लिग (एनपिएल) सिजन–२ मा लुम्बिनी लायन्सलाई पराजित गर्दै लगातार चौथा जित हात पारेको छ ।
प्रतियोगितामा लुम्बिनीको भने यो लगातार तेस्रो हार हो । उसले अहिलेसम्म एक खेलमा मात्र जित हासिल गरेको छ ।
बिहीबार लुम्बिनीले दिएको १ स ४४ रनको लक्ष्य सुदूरपश्चिमले १८.३ ओरभमा ३ विकेट गुमाएर पूरा गर्यो ।
उसका लागि ओपनिङ ब्याटर विनोद भण्डारीले सानदार ब्याटिङ गरे । ४९ बलको सामना गरेका ५ उनले चौका र ४ छक्काको मद्दतमा अविजित ६९ रन बनाए ।
जारी प्रतियोगितामा भण्डारीको यो पहिलो अर्धशतक पनि हो । त्यस्तै, आसिफ शेखले ३९ तथा क्रिस लिनले १६ रनको योगदान दिए ।
लुम्बिनीका लागि बलिङमा अभिशेष गौतम, रुबेन ट्रम्पेलम्यान, तिलक भण्डारीले एक/एक विकेट लिए ।
त्यसअघि टस हारेर ब्याटिङ गर्ने मौका पाएको लुम्बिनीले निर्धारित १९.४ ओभरमा अलआउट हुँदै गुमाएर १ सय ४३ रन बनायो ।
उसका लागि कप्तान रोहित कुमार पौडेलले सर्वाधिक ३५, दिलीप नाथले ३१, डार्शी सर्ट र सुमित महर्जनले १८/१८ तथा गुलबदिन नाइबले ११ रन बनाए ।
सुदूरपश्चिमका लागि बलिङमा हरमित सिंह र अविनाश बोहराले तीन/तीन तथा हेमन्त धामीले दुई र स्कट कुगेलेइजनले एक हात पारे ।
यो जितपछि यसपालि पनि सुदूरपश्चिमले प्लेअफको टिकट सुरक्षित गर्ने लगभग पक्का भएको छ । उसले चार खेलबाट ८ अंक जोडिसकेको छ ।
सुदूरपश्चिमले अझै लिग चरणमा तीन म्याच खेल्न बाँकी छ । सुदूरपश्चिमले अब एक खेल जिते ढुक्कका साथै प्लेअफमा स्थान बनाउने छ ।
हारमा ह्याट्रिक गरेको लुम्बिनीको प्लेअफ यात्रा भने निकै कठिन बनेको छ ।